பயப்பட வேண்டாம். தங்க பஸ்பம் சாப்பிடறது, ஆட்டுப் பால் குடிக்கறதுன்னு நான் கடி போட மாட்டேன். அதை விட சுலபமான வழி எங்கிட்ட இருக்கு. இலவசமாவே சொல்லித் தரேன். தமிழில் வலைப் பதிவு எழுதறதுதான் அந்த எளிமையான வழி. இதென்னாது, மொட்டத்தலைக்கும், முழங்காலுக்கும் முடிச்சு போடற கதையா இருக்கேன்னு சண்டைக்கு வராதீங்க. மேலே படியுங்க. நிச்சயமா ஏமாத்த மாட்டேன்
வலைப் பதிவு எழுதும் போது, அட நாம கூட ஏதோ புதுசா செய்யறமோன்னு ஓரு சின்ன திருப்தி 
பேசற தமிழுக்கும், எழுதற தமிழுக்கும் ரொம்ப வித்தியாசம் இருக்கு. "இங்கே வா" என்பதை, "இங்க வா", "இங்கன வா","இங்கிட்டு வா" என அருஞ்சுவையிலும் எழுதலாம். எந்த நடையில் எழுதுவது என்று யோசித்தால், மூளைக்கு கொஞ்சம் வேலை கிடைக்கிறது. (இல்லை என்றால் அது துருப் பிடித்து விடும்).
போட்டோ இல்லாமல் எழுதினால், கவர்ச்சியாக இருக்காது. அதானால், எந்த போட்டோ பொருத்தமாக இருக்கும் என மூளை கசக்கிப் பிழியப் படுவதால், மூளை இளமையாகிறது.
போட்டோவைப் பற்றியே யோசித்துக் கொண்டு இருப்பதால், ரோட்டில் இடைஞ்சலாக இருக்கும், எருமை மாடுகள் கூட அழகாகத் தெரிகின்றன. இதனால் எரிச்சல் படுவது குறைகிறது. மாறாக, நம் கலை ஆர்வம் கூடுகிறது.
சீரியஸாக எழுதினால், நாம படிக்கறதே கஷ்டம். அப்புறம் மத்தவங்க எங்க படிக்கிறது. மக்களுக்கு தொண்டு(!) செய்யும் நல்ல நினைப்பால், கொஞ்சம் விளையாட்டாய் எழுத முயற்சிப்பதால், நம் நகைச்சுவை உணர்ச்சி வளர்கிறது. 
நிறைய வலைப்பதிவர்களுக்கு ரசிகர் மன்றங்களே இருக்கும் போது, அவங்க அப்படி என்னதான் எழுதுகிறார்கள் என்று ஆராய்ச்சி செய்யும் போது, நிறைய புதிய விசயங்கள் நம் கண்ணுக்கு தட்டுப் படுகின்றன. நான் TVS50 என்ற மிக உபயோகமான வலைப்பதிவைக் கண்டு பிடித்தது அப்படித்தான்
ரொம்ப நாளா, தமிழில் எழுதாமல் விட்டு விட்டதால், "லள", "ரற" (வேலையா, வேளையா) என்று குழம்புகிறோம். தப்பாக எழுதக் கூடாது என்று, தன்மானம் தடுப்பதால், "லள", "ரற" எங்கு எதனை உபயோகிக்க வேண்டும் என மூளைக்குப் பயிற்சி கொடுக்கிறோம்.
தமிழ் தட்டச்சுப் பழக்கம் இல்லாததால், அதிகம் நேரம் பிடிக்கிறது. காகிதத்தில் எழுதி வைத்து பிறகு தட்டச்சு செய்ய முயற்சிக்கும்போது, கையெழுத்துப் பயிற்சி கிடைக்கிறது.
ரொம்ம நாளாக தமிழ், ஆங்கிலக் கலவையில் பீட்டர் விட்டுக் கொண்டிருந்ததால், சில தமிழ் வார்த்தைகளை நாம் பயன் படுத்துவதே இல்லை. அவற்றை அடிக்கடி எழுத்தில் உபயோகிப்பதால், பேசும் போது அவற்றைப் பயன்படுத்த இருந்த தயக்கம் குறைகிறது.
நாம இவ்வளவு கஷ்டப் பட்டு எழுதறோமே, அது மக்களுக்குப் போகணும்கிற நல்ல எண்ணத்தில், (நம்பாதிங்க, Page hit எப்படி ஜாஸ்தி பண்ணுறதுங்கற சுத்தமான சுய நலம்தான்) Tamilish, Tamilmanam, க்கு செல்வதால், பொது அறிவு விரிவடைகிறது.
மக்கள் கேட்டுக் கொண்டதற்காக, அதிகம் எழுத வேண்டி இருப்பதால், கம்ப்யூட்டரில் அதிக நேரம் செலவழித்தால், வீட்டில் கிடைக்கும் திட்டைப் பொறுத்துக் கொள்ளும் பொறுமை உணர்வு அதிகரிக்கிறது.
நம் வலைப் பதிவை எப்படி அலங்கரிப்பது என்று யோசிக்கும் போது, HTML கொஞ்சம் கற்றுக் கொள்ள முயற்சிக்கிறோம். W3School ங்கிற HTML Tutorial page யை நான் கண்டு பிடிச்சது இப்படித்தான்.
வலைப் பதிவிடுவது, நம்ம மூளைக்கு ரொம்ம வேலை கொடுக்குதில்லையா? மூளை சுறுசுறுப்பா இருந்தா, நாம சுறுசுறுப்பாத்தானே உணர்வோம். அப்புறம், நாம இளமையாத்தானே நெனச்சுக்கப் போறோம். இப்ப சொல்லுங்க, நான் சொன்ன எளிய முறை உண்மைதானே!
முக்கியமான பின் குறிப்பு:
எதுவுமே சும்மா வந்துடாது நயினா. எழுதறதே கதின்னு இருந்தா, என்ன கஷ்டம் (பதிவுலக போதை ) வரும்னு இங்க விரிவா அன்பர் எழுதியிருக்கார். ஓரு தரம் அதையும் படிக்கறது நல்லது.
--